di: Giovanni D'Anzi
 

Gh’è pòcch de rid quand passi per la via
la gent la me fa’ largo e tocchen fèrr:
i bottegar soo minga cosa sien
dal grand spavent tiren giò la clèr.

Chi l’è che se permètt de cicciarà
cont on sberlòtt di mè t’el foo pirlà.
Mì sont el Tumiami de Lorètt
e pòdi nò sentì cascià di fètt
nissun l’è bon de fà quèll che foo mì
e chi me contraddiss el foo pentì.
Mì fermi on tramm in corsa cont on boff
e mangi a trè ganass compagn d’on loff
cont on colpètt de toss va giò ona cà
e quand voo a spass a trèma tutta la città.

El Tumiami el passa in depertutt
el sann che mì diventi subit brutt
e quèll che voeuri voeuri senza brus
con mì la tacca nò ciappà di scus.

I tass ie paghi pròppi l’ann che ven
e ghe fa pippa a tucc e ghe convegn
perchè con Tumiami de Lorètt
a l’ospedal gh’è semper pront trii ò quatter lètt.

A on ristorant de lusso l’altra sera
me son sbaffaa trii piatt de manz a lèss
on quattr ò cinch bottili de Barbera
e on pasticcino a l’onda faa col pèss.
Ma quand l’è stada l’ora de pagà
el camerer l’ha cominciaa a tremà.

Ohe: mì sont el Tumiami de Lorètt
s’ te tentet de parlà te taj a fètt,
ma el camerer ‘sta faccia de birbon
l’ha cominciaa a riempimm de sberlotton.
Mì foo trii pass indree per riparamm,
ma lù el cessava minga de pestamm
e intant che mì vosavi come on matt
in sù la testa el me spaccava tutt i piatt.

El Tumiami a fà de ‘sti figur?
A mì, che cont on pugn a sbusi on mur
Insòmma per piantalla, per pietà
me son decis in ultim a pagà.
Gh’hoo lassaa per mancia quatter dent,
ma el camerer ‘l tremava de spavent
perchè col Tumiami de Lorètt
a l’ospedal gh’è semper pront trii ò quatter lètt.