di: Marco Candiani - Claudio Merli
 

L’era quasi nòtt, gh’era on nebbion e seri là
in fond prima di praa
seri al Giambellin come a cercà i mè vint ann
in strada ò in d’ona piòla.
Là dedree i vedrinn on poo panaa gh’era on biliard
duu dadi e on màzz de cart,
ma di mè amis gh’era pù, nanca pù l’ombra de chi
giugava a concia con mì.

Al mes de magg se spettava
foeura de gesa i tosann
che te inzigaven magari on ciccin,
ma poeu correven a cà.
Ma che fin hann faa tucc i amis di mè vint ann
sui strad del Giambellin.

Se tirava nòtt e stavom lì a cicciarà
de spòrt sul marciapee
ò de bèi tosann che al Giambellin, foo nò per dì,
ghe n’era fòrsi on mila.
Stavom lì a inventà stòri de dònn mai conossuu,
inscì per fà i depù
Ma che fin hann faa i discussion,
Bartali e Coppi hinn andaa
a corr on gir in di stèll.

Inscì passava la vita
dent in la piòla coi cart
ò in la strada coi dadi de nòtt
sòtta la lus d’on lampion.
‘Dèss conossi pù el Giambellin e rèsti chì
senza on amis per mì.