Stampa

di: N. Svampa - Brassens
 

 

Mì me pias el brutt temp,
lassa stà el mes de luj
quand l'è on poo ch'el pioeuv nò
mì me vègn de trà sù;
domà s'el pioeuv mì sont allegher
perchè il più grande amore che gh’hoo avuu fin adèss
se gh'hoo de vèss sincer
l'è rivaa giò del ciel
on dì che l'era brutt e ne-e-gher.

L'era el mes de november, 'na sera de quèi
che tronava e pioveva coi saètt in ciel.
La mia visina la me sòna
in camisa de nòtt, la me dis: «per piasè,
sont a cà in de per mì, solla e senza marì,
mi tenga qui che gh’hoo paura ...

Sa com'è – la me fa – el mè marì l'è sortii
per andà in gir a vend pròppi chi affari lì
come se ciamen? ...parafulmini,
tutti i vòlt che ’l Signor el fa pioeuv e tronà
el me pianta chì in cà
perchè lù el gh’ha de ‘ndà
a fa ’l suo giro per la ditta!»

«Benedetto Franklin che inventò il parafulmine!
Mì ghe disevi e la basavi sù.
E poi l'amore ha fatto il resto
Tì che te veet in gir a piantann de per tutt
te dovarisset piantann on quaivun anca chì
sora el tò tècc de pastafròlla!

Quand i nivol in ciel cont i tròn e i saètt
hinn andaa pussee in là, la salta sù del lètt
e la me dis: «ora va meglio!»
L'ha cattaa su i sò strasc poeu l'è andada de là
e la m'ha daa el pontèll per el primm temporal:
«per quando torna la bufera!»

Mì soo nò se succed, ma l'è giamò on quai mes
che mì sbassi puu i oeugg, che vardi sempr' in ciel:
sto lì a vardà se gh'è ona nivola
che la vaga a scontrass cont i alter de bass
voo a vedè i prevision a la television
ma l'hoo puu vista ne la zòna.

Sto pirlon d'on marii l'ha faa sù tant danee,
l'ha venduu quèll dì là tanti tocchèi de fèrr
che l'è diventaa milionari
e hinn andaa de per lor a fà la vita del scior
in d'on pòst che soo nò
'mè 'l se ciama però
comunque lì non piove mai!

'Dèss mi speri domà che quand sont 'dree a cantà
ghe ziffola i orègg e ghe par che in sul tècc
l’è ‘dree a vegnì giò anmò el diluvi
e la ghe disa al marii che vun di tanti dì
quand che lù l'era adree a fà su i sò danee
ci fu per lei il colpo di fulmine.