di: Claudio Merli
 

Come semper l’incomincia
cont el ciar de la mattina noeuva che ven,
a l’è on alter dì che passa
te regala el Padre eterno, Dio del ben.

Incoeu canti a la Baggina
ai veggètt ‘na canzonètta
per portagh on poo de bonumor
el dòpomezzdì in cassina
saroo stracch e ona cadrega me sètti giò;
tant el sòlit tran tran
giornad che a Milan giamò hinn passaa.

Tant se cambia on quaicòss
l’è semper in pesg,
l’è mèj pensagh nò.

A l’è tutta on’altra stòria
hoo perduu anca la memòria in d’on moment,
ma gh’è on alter dì che passa
te regala el Padre eterno, Dio del ben.

Se ve cunti sù la stòria
a gh’è nò de tralla in glòria
per on pòver Crist ch’ el fa pietà
milanes a la berlina
d’ona stòria meneghina che la finiss
tant el sòlit tran tran
giornad che a Milan giamò hinn passaa.

Tant se cambia on quaicòss
l’è semper in pesg,
l’è mej pensagh nò.