di: Brambilla
 

Ona vòlta gh’era in quèll del Giambellin
on gioeugh de bòcc con pèrgola e giardin
a l’era quèll d’on trani con l’osteria
istèss di alter, là in periferia.

A l’era l’osteria del genoeugg
gh’era la compagnia del mal d’oeugg
faseven la partida tutt’i ser
tra ona staffètta, on liter, on biccer.

Carletto te see curt la monta nò
s’te bòccett ben la toa la resta giò
vagh a ballin, Giusepp, damm a trà a mì
ò via la soa de pont ghe n’èmm giò trii.

Convien ‘ndà a pont gh’è dent’ ‘na cà
ven sù chì drizz a mì, basta ruzà
ghe voeur on rigol, Pepp, vun de chì taj
che se te see sù de gir te sbagliet mai.

El Pepp el se prepara, el mira, el sara on oeugg,
trii pass, ona corsètta, piegaa sora i genoeugg.
Dai, Pepp, la gh’è, la gh’è, nò! L’è sbagliada,
tiren on altra, bòna: che bocciada!
Vedèmm on poo: vòtt pont e l’è finida,
m’hann faa sudà per vinc ista partida.

I pont marcaven cont on tòcch de gèss,
ciamaven el pontista “Pont e mèzz”,
quèll che bocciava ben “El rigoletto”,
a on alter ghe diseven “Gin l’elmetto”
perchè ona sera a giugà in de ch’el trani
gh’aveven tiraa on rigol in del crani
e a l’ospedal ricoveraa d’urgent
gh’hann faa la vòlta cranica d’argent.

Carletto te see curt la monta nò
s’te bòccett ben la toa la resta giò
vagh a ballin, Giusepp, damm a trà a mì
ò via la soa de pont ghe n’èmm giò trii.

Convien ‘ndà a pont gh’è dent’ ‘na cà
ven sù chì drizz a mì, basta ruzà
ghe voeur on rigol, Pepp, vun de chì taj
che se te see sù de gir te sbagliet mai. 

El Pepp el se prepara, el mira, el sara on oeugg,
trii pass, ona corsètta, piegaa sora i genoeugg.
Dai, Pepp, la gh’è, la gh’è, nò! L’è sbagliada,
tiren on altra, bòna: che bocciada!
Vedemm on poo: vòtt pont e l’è finida,
m’hann faa sudà per vinc ista partida:
vedemm on poo: vòtt pont e l’è finida,
m’hann faa sudà per vinc ista partida.