di: Popolare
 

Ohvej giovinòtt fii ben attenzion
ve voeuri cantà ona bèlla canzon
de duu fradèi prèss a Milan
vun Battista e l'alter Giovann.

L'ha cominciaa el fradèll pirlòtta
che ‘l ghe parlava a ona paisanòtta
de statura puttòst bassa
l'era larga quatter brazza.

L'era bèlla l'era bòna
l'era savia ‘sta fiolòna
del color del latt e vin
a l'era el tesòr del Giovannin.

Ma anca al fradèll sto ciccolatt
el sghignazzava come on matt
a vedè ‘l fradell pirlòtta
che ‘l ghe parlava a sta paisanòtta.

Te vedarèmm tì ohvej remolazz
ma con chi l'è te ‘ndareet a sposass
te vedarèmm tì ohvej remolazz
con chi l'è te ‘ndareet a sposass.

Allora lù pien de pontili
el butta el capèll in del Navili
el cor de sora in del cassetton
el tira foeura i pagn del feston.

El ciappa el tram che vegn a Milan
el va a l'albergo di Trii Tulipan
el va in d'on trani a mangià on boccon
el ved ona dòna lì in d'on canton.

On poo con furia e on poo con flèmma
l'invida a disnà insèma
el gh'è staa insèma ona giornada
e poeu a cà se l'è menada.

Ohvej fradèll a gh'hoo chì ‘l tesòr
l'è granda e gròssa e la par on tòr
ohvej fradèll a gh'hoo chì ‘l tesòr
l'è granda e gròssa e la par on tòr.

Hann combinaa ‘sti duu tripee
in del stèss dì de toeu miee
e han invidaa precisament
tutta la pòrta e tutt’i parent.

E poeu hann mangiaa de la gran famm
vottanta chili de salamm
quaranta gainn cinquanta cappon
sètt porscei e vòtt monton.

Trii padèi de risòtt giald
quatter mastèi de lasagn cald
ses cavagn fra uga e per
e quatter navasc de cafè ner.

E poeu hann bevuu sti duu meschin
a squarciagola brent de vin.
Òh mama mia son bon pù de boffà
spetti l'ora de ‘ndà in lètt a cobbià.

Ma el fradèll el vedeva nò l'ora
de ‘ndà in lètt con la soa sciora
ma l'era grassa come on boeu
e de l'uss la passava nò.

Fin che ruza e ruza ben
hinn riessii a ruzalla dent
fin che ruza e ruza ben
hinn riessii a ruzalla dent.

L'ha cominciaa sto gran donnon
a trà foeura la scuffia cappèll e spinon
tra foeura la scuffia a l'inviada
ohvej la gh'aveva la crappa pelada.

L'ha cominciaa quiètt quiètt
a tiragh foeura tutt’i fassètt
e lù ‘l vosava “Vegn chì ò fradèll
vedèlla in camisa la par on cammèll”.

La gh'ha i oeugg fosch fosch
la gh'ha ‘l nas che tira i mosch
e poeu la gh'ha ‘l stòmegh che ‘l par on teccètt
che per impienill ghe voeur el boffètt.

La gh'ha i gamb ch'hinn duu giambon
sui dit ghe crèss i erbion
per de pù la gh'ha i pee piatt
la gh'ha la pèll come quèlla d'on sciatt.

Ohvej mi credevi menà a cà on barcon
vedèlla in camisa l'è nanca ‘l timon
oh giovinòtti tornee indree
se gh'ii voeuja de toeu miee.

Poeu damm a trà a mi fii ‘na ròba precisa
vardegh ben quand l'è in camisa
poeu damm a trà a mi fii ‘na ròba precisa
vardegh ben quand l'è in camisa.

Pan pòss pan frèsch
indovina ‘me l'è quèst
Pan pòss pan frèsch
indovina ‘me l'è quèst.