di: Aurelio Barzaghi
 

El lavorava in ona banca
a l’era el vice direttor
on bèll dì l’ha dii “che barba
par de vèss a San Vittor,
lassi chì la mia camisa, la cravatta e ‘l mè cappèll
lassi chì la valisètta
e me foo vestì de pèll”.

Ne (*) la giongla nera nera
in dove gira nanca on tramm,
l’ha faa sù la soa casètta su ona pianta in mèzz ai ramm
el gh’aveva la scimbiètta, el giugava coi serpent
ne (*) la giungla nera nera ghe mancava pròppi nient.

Gh’è on elefant che tutt’i ser
gh’è on elefant che tutt’i ser sòna la tromba
e on pappagall, e on pappagall
e on pappagall che sbatt i al a temp de rumba,
gh’è ona vèggia tartaruga cont on poo de raffreddor
che la canta ‘me ona matta per el vice direttor.

Ricercato dai caramba, da la suocera e miee
cerca cerca, gira gira
gh’è nissun che ‘l sa in dove l’è
ne (*) la giongla nera nera el se ‘scond fra i scimpanzè
el se gratta sòtta sèlla
el se nètta i dit di pee:
el lavorava in d’ona banca
l’era el vice direttor
ne (*) la giongla nera nera
adèss el viv compagn d’on scior.

Cont on serpent in gir al còll
e col cappèll de maresciall con sù la piuma
el va a cavall d’on coccodrill
e on orangotan ghe dà on basin sòtta la luna,
mì soo nò ‘me l’è finida,
mì la stòria la soo pù
caso mai se ‘l passa in banca
se la fèmm cuntà de lù,
mì so nò ‘me l’è finida,
mì la stòria la soo pù
caso mai se ‘l passa in banca
se la fèmm cuntà de lù.

(*) Non bisogna toccare il testo originale, ma sarebbe meglio mettere “In” piuttosto che “Ne”