di: W. Di Gemma
 

In la via Fratelli Zòia col sò òrt e la soa cà
el viveva senza tònega on lunatich scior curaa
coi decòtt i benefizzi el donava a cent curios
che da lù con sacrifizzi se fiondaven fiducios.

Don Giuseppe Gervasini detto “pret de Ratanaa”
coi sanguètt e cent impiaster el guariva i sò malaa
senza dì l’Ave Maria ie ciappava sòtta brasc
con la longa terapia de cent mila parolasc:
“Oei tì dòna imbellettada, col rossett che te gh’hee sù
saria mèj che t’ el mettesset nò su i laber, ma sul cù,
ciappa el manich de la vanga minga quell del tò Marcell
vamm streppà l’erbetta marscia che rivoltom l’ortisell”.

On bèll dì ghe riva denter on omett paralizzaa
el gh’ha dii: “Mì sògni semper de podè imparà a noà”.
Senza ciaccer ne consili su la Ripa l’ha portaa
l’ha ruzaa giò in del Navili e, miracol, l’ha imparaa.

Don Giuseppe Gervasini detto “pret de Ratanaa”
cont i ris’c e cent disaster el guariva i sò malaa
senza dì l’Ave Maria ie ciappava sòtta brasc
con la longa terapia de cent mila parolasc.
On veggett de via Marghera el gh’ha dii “Pietà Signor,
gh’hoo in del còll mattina e sera ona valanga de dolor”.
“Guarda nò i tosann per strada,
quand s’è vegg l’è semper mòll
te concludet mai nagòtta e poeu te vegn el stòrtacòll”.

El prevòst in de la stòria el sò pòst l’ha conquistaa,
per on fatt che in la memòria de la gent l’è anmò restaa
in quell dì ormai leggendari sora el tram di Fòrz Armaa
el s’è accòrt el bigliettari che ‘l prevòst l’ha nò pagaa, ia ia.
El gh’ha dii: “Scior reverendo, me dispias, ch’ el vaga giò”
Lù l’ha dii “Va beh io scendo, ma el tranvai per mì el va nò”
L’è staa inscì che ‘l scior vicari l’è andaa giò senza fiadà
ma ‘l tranvai sora i binari tutt el dì l’è staa bloccaa,
ma ‘l tranvai sora i binari tutt el dì l’è staa bloccaa.

In la via Fratelli Zòia gh’è anmò l’òrt e anmò la cà,
on quaivun l’ha dii: “Che nòia, senza el pret de Ratanaa”,
in compens gh’hinn cartomanti che soddisfen tutt’i voeuj
de miracol ne fann tanti, ma fann mal al portafoeuj.