di: Nanni Svampa
 

De tant piscinin che l'era
el ballava volentera
el ballava in su on quattrin
cont insèma el fradellin
che 'l pareva on pigottin
de tant che l'era piscinin
de tant che l'era piscinin.

Coi bacchètt d'ona fassinna
l'ha faa on tavol de cusina
n'ha vanzaa ancamò on ciccin
l'ha faa foeura el sgabellin
per mètt sù i sò bèj pescin
de tant che l'era piscinin
de tant che l'era piscinin.

Con 'na brassa de fustagn
l'ha faa foeura tutt i pagn
n'ha vanzaa ancamò on ciccin
l'ha faa foeura el gilerin
de mètt sù al sò fradellin
con fà dent el saccoccin
per mètt dent l'orologin
de tant che l'era piscinin
de tant che l'era piscinin.

Con 'na brassa de tarlis
l'ha tajaa dusent camis
n'ha vanzaa ancamò on ciccin
l'ha faa foeura i manscionin
de mètt sù al sò fradellin
de tant che l'era piscinin
de tant che l'era piscinín.

On dì giust cont on quattrin
l'ha faa foeura on caldarin
n'ha vanzaa ancamò on ciccin
l'ha faa foeura on padellin
per rostigh el fideghin
ghe ne dava al fradellin
de tant che l'era piscinin
de tant che l'era piscinin.

Cont on sigher de Cavour
l'ha fumaa quarantòtt or
n'ha vanzaa ancamò on ciccin
ghe n'ha daa al sò fradellin
che 'l casciava el sò fumin
de tant che l'era piscinin
de tant che l'era piscinin.

Cont on pugn soltant de tèrra
l'ha faa foeura on camp de guèrra
n'ha vanzaa ancamò on ciccin
l'ha faa foeura sètt fortin
per mètt dent i soldarin
comandaa dal fradellin
che l'ha faa caporalin
de tant che l'era piscinin
de tant che l'era piscinin.

Con 'na brassa de ramètt
l'ha faa foeura on bel s'cioppett
ghe l'ha daa al sò fradellin
per tiragh a l'usellin
quand l'andava al boschettin
de tant che l'era piscinin
de tant che l'era piscinin.

Ona sèggia de calcina
l'ha servii a fa la cassina
n'ha vanzaa ancamò on ciccin
l'ha faa foeura on casottin
de mètt dent el porscellin
che 'l pareva on formighin
de tant che l'era piscinin
de tant che l'era piscinin.

De tant piscinin che l'era
el dormiva volentera
el dormiva su on cossin
cont insèma el fradellin
faven giò el sò sognettin
che pareven poresin
de tant che eren piscinin
de tant che eren piscinin.