Stampa

di: Walter Di Gemma
 

 

Voeuri dill, me fa nient
la mia canzon l'è fòrsi irriverent...
Me fa nient, voeuri dill ;
doperi i mè penser, minga 'l fusil !
Milan l'è ‘dree a capì che i "star del milanes"
hinn diventaa on malann puttòst estes
perchè in del scriv poesii e in del cantà canzon
rovinen la soa grand reputazion...

Basta col coeur in man
despèss l'è ipocrisia
coi canzon e i festival l'è on'agonia.
Basta sgranà la vos
per fà sentì la nèbbia.
L'è penos vedè Milan vosà in la gabbia !

Voeuri dill, me fa nient
in tanti me darann del prepotent.
Me fa nient, voeuri dill
perchè l'è pussee inutil vèss gentil.

Basta ciamall "dialètt",
Milan el gh'ha ona lingua,
coi regòrd martirizzaa el gh'entra minga!
Basta coi s'cèppa coeur che canten la Baggina
perchè i vègg gh'hann nò bisògn de naftalina.

Milan l'è ‘dree a capì che 'l gh'ha bisògn de crèss,
de palesà i valor che 'l sent adèss;
el voeur la dignità, l'identità per viv,
freschèzza in del cantà e anca in del scriv....

Basta coi cantautor che scriven mai ona rima
e se fann scriv i canzon da quèj "de prima".
Basta con quèi borios; per fama fann sì pèna
pien de copp e medajon lor vann in scèna.

Basta con quèj che fann cultura rossa ò nera
per ciappass a cortellad in la ruera !
Basta sconfond anmò canzon col nòmm "Poesia"
minga tucc vègnen sù ben, compres la mia !