di: Walter Di Gemma
 

In on temp che la memòria la fadiga a ricordà,
gh’è pussee de ona leggenda che riguarda ona città.
Tutti sann che in la pianura l’è nassuda pòcch a pòcch
grazie a pòpoli diversi che l’hann costruida ad hoc.

Umbri, veneti e poi liguri ed etruschi s’hinn fermaa,
ma poi i Galli, detti Celti, in on minutt j hann sbarazzaa!
Tito Livio, grande storico, l’haa dii che poeu hinn staa lor
a fondà Milan per primi con pazienza e con calor.

Tutt el sann come l’è fada: gh’è la Scala o poeu gh’è ‘l Dòmm
pòchi sann però com’è che l’hann ciamada col sò nòmm!

L'è curiosa la leggenda de duu galli capitàn
che d'accòrd hann deciduu de battezzalla coi sò man;
vun el se ciamava Medo, l'altro Olano e l'è staa inscì
che in del mètt insèma i nòmm el Medo-Olano hann stabilii !
Gh'è chi dis: “l'è minga vera, l'è invenzion de giargianes...
chi bisògna che la stòria la sia ciara ai milanes,
perchè intorna a la vicenda de leggend ghe n'è che crèss,
anca voeuna spiritosa che ve cunti pròppi adess”.

Tutt el sann come l’è fada:…

Dòpo Cristo, quarto secolo, de dubbi ghe n'è nò;
tutta colpa d'ona bestia mèzza lana e mèzza nò
che in la fertile pianura la viveva a chi temp là;
media-lana, medio-lanum, el gioghètt l'è bèll e faa!
La sarà anca fantasiosa ma l'è bèlla de morì
me dispias domà pensà che l'è per nient andada inscì,
anca se in la via Mercanti, sul palazz de la Reson,
in riliev gh'è sù ona bestia mèzza biòtta col majon!

Tutt el sann come l’è fada:…

I tedeschi gran filòsofi, parsimonios e sagg,
hann dii che Milan voeur dì semplicement "paes de magg".
L'è sta quèll el mes precis de quand i Galli s'hinn faa grand,
la conferma l'è in del fatto che in tedesch se dis "mai-Land" ...
Ma la stòria pussee vera che interèssa i meneghin
l'è sconduda in di paròll che vègnen foeura dal latin;
medio-lano "medio" celtico e poeu "planus" detto "lan"
che voeur dì "paes in mèzz a la pianura", senza ingann!

Tutti sann come l'è fada; gh'è la Scala e poeu gh'è'l Dòmm
le sann tucc adèss com'è che l'hann ciamada col sò nòmm;
dal latino Mediolanum e Milano in italian,
ma in dialètt i milanes la ciamarann semper "Milan" !!!