di: Luigi Medici - Claudio Merli
 

In fond a la strada
gh’è ‘l banch de l’inguria
“L’è frèsca, gelada!“
la vosa la dòna
“Sù fioeu che cuccagna,
se bev e se paccia,
se lava la faccia! “
La fiamma scarlada
l’infiamma de sangh
la tèsta tajada
su l’òrlo del banch.
“L’è bòna, l’è stagna,
se bev e se paccia,
se lava la faccia!”.
In fond, in l’ombria,
centmila crappon
i spètten la stria
ch’ je taja a boccon.
“L’è dolza, l’è bòna,
se bev e se paccia,
se lava la faccia!”
Ciaff ciff e ciff ciaffa…
sui fètt la fontana
la sbròffa, la sgiaffa,
la fa la giavana…
“Sù, fioeu, che cuccagna,
se bev e se paccia,
se lava la faccia!”
“Popòla, ne voeur?
L’è appèna tajada,
l’è on tòcch del mè coeur,
l’è rossa e gelada.
L’è dolza e giazzada…
L’è ‘l coeur de la strada…
se bev e se paccia,
se lava la faccia!”.