di: Nadir Scartabelli

Dove ona vòlta giraven i tram
dòpo el pont tra la Trecca e ‘l Verzee
la schedina in man,
òmen in fila dal tabacchee.
On rion faa de cà popolar
domà on vial a dividel in mezz
che a stà sù al quint pian
pareva quasi tajaa col cortell.

Gent de periferia malada de sògn
gh’hann el coo in su la luna
e i saccòcc pien de bisògn.
Gent de periferia giugà la Sisal per temp
e vess giamò milionari prima che ven lunedì.

Dove ona vòlta giraven i tram
sbarbatei fresch anmò de cortil
metten foeura el nas
voeuren sentì l’odor che gh’è in gir,
ma la sera se incontren al bar
on milion de progett in la ment
la dove gira el tram
el temp el passa, succed mai nient.

Sbarbaa cressuu per la strada
semper in gir a cercà
l’eco d’on mond che ‘l vosava
i pari opportunità.
Sbarbaa cressuu per la strada
in gir gh’era domà quell
el tribulà de la vita
e a on tir de sciòpp el pontell.

Dove ona vòlta giraven i tram
gh’era el tunnel che canta el dottor
quatter franch in man
comprà la polver che dà calor;
medesina de tutt i malann
che a la fin la te manda al macell
non anmò vint ann,
ma giamò pront a giugà con la pell.

Sbarbaa de periferia malaa del bisògn
avegh in còrp l’energia
per sfidà on mond senza sògn;
sbarbaa de periferia
che galantòmm l’è staa el temp,
v’ha faa pagà con la vita el prezzi d’on divertiment.

Metti el coo denter dal tabacchee
e gh’è minga la fila de fà
tiri avanti istess
perchè el mè tredes l’hoo giamò faa.