Stampa

di: Giorgio Danese

 

Gh’era on òmm che ‘l cantava Milan
coi ricòrd el tornava lontan
el parlava di sò primm amor
el scriveva poesii per i fior.
Tutt el dì la ghitarra in di man
el girava sù e giò per Milan
la soa vos la se sent ancamò
quand la nòtt pian pianin la ven giò.

Ciao Milan, ciao Milan, ‘me te stee?
Senti el coeur che ‘l me parla de tì
in de l’aria on profumm de lillà
sù in del ciel tanti stèll argentaa.
Ciao Milan mì te voeuri on gran ben
quand te guardi me senti seren
quanto temp gh’è passaa
sont anmò innamoraa
finchè vivi te voeuri cantà.

Ona sera distes l’hann trovaa
sù la strada che pòrta a Lambraa
l’era pròppi el dì de Natal
el doveva ricev on regal.
L’ha lassaa intorna a lù tanti amis
el sò coeur l’è volaa in Paradis
la soa vos la se sent ancamò
quand la nòtt pian pianin la ven giò.

Ciao Milan, ciao Milan, ‘me te stee?
Senti el coeur che ‘l me parla de tì
in de l’aria on profumm de lillà
sù in del ciel tanti stèll argentaa.
Ciao Milan mì te voeuri on gran ben
quand te guardi me senti seren
quanto temp gh’è passaa
sont anmò innamoraa
finchè vivi te voeuri cantà.

musica

L’è finida la stòria d’on òmm
che ‘l gh’aveva in del coeur tutt Milan
quanto temp gh’è passaa
on ricòrd l’ha lassaa
i canzon che tucc voeuren cantà
i canzon che tucc voeuren cantà
i canzon che tucc voeuren cantà.