di: Aurelio Barzaghi

M’hann dii ch’ el dondava de chì
ch’ el dondava de là
el ciamaven “el bamba”
però cont i oeugg de furbett
el lumava i donett che ballaven el samba.

M’hann dii che ona nòtt l’è partii
coi bermuda bordò
e on bigliett per Bahia
e adèss chi sa se ‘l fa?

M’hann dii che l’han vist a basà
ona dòna de lì con duu meter de gamba
però se sa sì, se sa nò, se l’è vera soo nò
la faccenda l’è stramba.

Perché lu el ghe ved ancamò
e l’è bon de basà el palett d’ona tenda
e poeu de dì “my love”.

Me par de vedell che ‘l cammina de sbiess
el bamba ch’ el donda el scarliga ‘me on pess,
el bamba ch ‘le donda l’è in gamba però
puttòst che fà el bamba lu el balla el fox-trot.
El bamba l’è in ponta coi oeugg de balòss
se rossa, se mòra, se bionda, l’è istess.
Gh’è voeuna che in pista la par on comò
però la respira e la dis mai de nò.

M’hann dii ch’ el dondava de chì
ch’ el dondava de là
el ciamaven “el bamba”
però cont i oeugg de furbett
el lumava i donett che ballaven el samba.

M’hann dii che ona nòtt l’è partii
coi bermuda bordò
e on bigliett per Bahia
però l’ha sbagliaa marciapee
l’ha ciappaa el primm dirett
che se ferma a Pavia.

L’hann vist ch’ el girava in gir a on rondò
con voeuna rotonda che par on comò
però la respira e la dis mai de nò
la balla anca el samba al ciar del falò,
però la respira e la dis mai de nò
la balla anca el samba al ciar del falò,
la balla anca el samba al ciar del falò,
la balla anca el samba al ciar del falò….