di: Aurelio Barzaghi

Chissà, chissà perchè
se senti on fioeu che parla milanes
me ven la voeuja de strengiomel sù
me ven la voeuja de parlà con lù.

Perchè, perchè, perchè
se senti on fioeu che parla milanes
voeur dì che el nòst Milan el voeur nò morì
e demmegh ona man per fall fiorì.

E se la va, e se la va
chissà che bell fermass a cicciarà
con on queivun fin mezzanòtt
magari per parlà del nòst risòtt
e col penser girass indree
e accòrges che l’è bell istess di ier
parlà de dònn, stringes la man
e fagh tanti auguri al nòst Milan.

E poeu vedè Milan svegliass a pòcch a pòcch
e podè dìgh de pensagh nò
e de stà in pee bell drizz.

Chissà, chissà perchè
se senti on fioeu che parla milanes
voeur dì che el nòst Milan el voeur nò morì
e demmegh ona man per fall fiorì.