di: Nino Rossi

Gh’è stà Milan colossal,
grand’hotel, grattaciel, la metropolitana,
supermercaa, gran via-vai,
autobus e tramvai e la gent a fiumana.
Ma in de ‘sto grand polpetton,
a s’è salvaa anmò on canton,
l’è quèll fettin de città
che la gent milanes a ghe pias ritroà.

Sòtta brascètt per la vèggia Milan,
indoe tutt’i casètt
gh’hann al massim trii pian,
piccol finèster coi bèi vas de fior,
ornaa de tendin
coi disègn a color.
Vègg costruzion senza celebrità
che senten de nòtt el Navili parlà,
ai milanes el ghe manda on appèll:
“Fee nò sparì ‘sto canton inscì bèll”.

Bèi dònn scrusciaa su la prèia
bagnada, a fil d’acqua,
lavaven con lèna
per tirà grand i futur
industriai de Milan,
se s’ceppaven la s’cèna.
Guardi el Navili passà
e je saludi sòtt vos.
Numm gh’èmm ‘sta bèlla città,
otomòbil, bèi cà,
lor, l’artrite… ò ona cros.

Sòtta brascètt per la vèggia Milan,
indoe tutt’i casètt
gh’hann al massim trii pian,
piccol finèster coi bèi vas de fior,
ornaa de tendin
coi disègn a color.
Vègg costruzion senza celebrità
che senten de nòtt el Navili parlà,
ai milanes el ghe manda on appèll:
“Fee nò sparì ‘sto canton inscì bèll”.

musica

ai milanes el ghe manda on appèll:
“Fee nò sparì ‘sto canton inscì bèll”.