Stampa

di: G.Margorani - F.Patterlini

 

dedicata ai coniugi Annamaria Paganini e Adriano Fumagalli - 1999

On vestidin color ròsa,
con la sottana a godet…
scarpètt coi tacch a la mòda,
calzètt de naylòn fumée…
Mì me sentivi leggera,
gh’avevi el pass misuraa…
pian pian calava la sera
e numm se sèmm incontraa.

L’era per mì el primm pontèll
e seri on poo emozionada…
lù l’era lì e l’era bèll…
mì me sentivi guardada.
Man in la man… èmm camminaa…
vegneva scur pian pianin…
e in d’on canton, senza parlà…
lù ‘l m’ha robaa ‘l primm basin.

El mè vestii color ròsa,
ghe l’hoo ancamò semper quèll
l’è in on cassètt ch'el ripòsa,
l’è ‘l mè regòrd pussee bèll.
Adèss son sposa e son mama,
lù ‘l me voeur ben, sèmm content,
on bèll romanz, ona trama…
e on primm pontèll in la ment.

L’era per mì el primm pontèll
e seri on poo emozionada…
lù l’era lì e l’era bèll…
mì me sentivi guardada.
Man in la man… èmm camminaa…
vegneva scur pian pianin…
e in d’on canton, senza parlà…
lù ‘l m’ha robaa ‘l primm basin.

musica

e in d’on canton, senza parlà…
lù ‘l m’ha robaa ‘l primm basin,
quand gh’è l’amor, l’è tanto bèll
pensà ancamò
al primm pontèll.