di: Walter di Gemma

Gh’e quell che ‘l se fa vanto de vess nassuu a Milan
e quell che ‘l ved nò l’ora de stà de cà lontan
gh’inn quei cont el compless de vess di forestee,
ma tucc la nòstra lingua se vanten de savè.
Al banch frutt e verdura del mè supermercaa
hoo faa ona cicciarada con vun che ‘l sta a Lambraa
el catta sù i magioster in on dialett malsan
el dis “va che bèi fragol” e l’è nassuu a Milan…

Dove son finiti i milanesi, chi lo sa?
Sì, hoo giamò capii: se troeuven nò al supermercaa
fòrsi da on quai temp hinn tucc saraa sù in cà
fòrsi l’è perché sann pù con chi parlà
fòrsi hinn ‘dree a spettà ona quai rivoluzion
dove gh’è i cannon che sparen panetton.

Chi dis che chi a Milano se parla pù el dialett
che l’è italianizzaa, svoiaa come i michett
ghe n’è de coraggios che parlen meneghin
e al pòst de dì “basell”, te disen el “gradin”;
van giò dal pastissee, offellee se usa pù
gh’inn quei che disen “mestol” invece de “cazzuu”
chi va dal salumee e non dal cervellee
chi fa vegnì l’idraulich invece del trombee.

Dove son finiti i milanesi, chi lo sa?
Sì, hoo giamò capii: se troeuven nò al supermercaa
fòrsi da on quai temp hinn tucc saraa sù in cà
fòrsi l’è perché sann pù con chi parlà
fòrsi hinn ‘dree a spettà ona quai rivoluzion
dove gh’è i cannon che sparen busecon.

Dove son finiti i milanesi, chi lo sa?
Sì, hoo giamò capii: se troeuven nò al supermercaa
fòrsi da on quai temp hinn tucc saraa su in cà
fòrsi l’è perché sann pù con chi parlà
ma speremm che l’abbien nò dismentegaa
se nò restom in des e semm ciollaa.