di: Aurelio Barzaghi

Quand vegn giò la sera
e me ziffola i orègg
soo nò se l’è staa el Barbera
oppur el ricòrd di mè vègg
ò i vos de ringhera che adèss senti pù
ò fòrsi el penser de la mia gioventù.

Quand vègn giò la sera
e me ziffola i orègg
soo nò se l’è staa el Barbera
oppur la mia faccia in del spègg
ò i rugh sòtta i oeugg che adèss vann via pù
ò i cavei gris come el papà del Gesù.

Quand vègn giò la sera
e me ziffola i orègg
la colpa l’è nò del Barbera
son mì che diventi on poo vègg
son mì che diventi on poo vègg.

Giuga, giuga fioeu che el temp el passa
el savor de gramm in bocca el lassa
giuga, giuga fioeu senza pensà
doman l’è on alter dì
se vedarà:
giuga, giuga fioeu senza pensà
doman l’è on alter dì
se vedarà.