di: Dario Ferretto

Cont el traffic ormai congestionaa
‘na macchinetta mì voeuri comprà:
voo a vedè dò ò trè utilitari
e l’è lì che ven foeura el patatracch.

Dervi la portera de sinistra
cerchi de andà denter per la guida,
ma ogni sforzo sta risultando vano
per la pancia e per il deretano.

Mangia pòcch, mangia quasi nient
con la panscia te tocchet el volant
te gh’hee i brasc che paren duu giambon
e te riesset nanca a schiscià on botton.

Son settaa giò incastraa come on salamm
tra ona marcia e el fren a man
ed alla fine l’ardua sentenza:
io di cibo dovrò restare senza.

Son chì bloccaa in su sto tòcch de latta
sògni cassoeula, busecca e ciccolatt,
sògni nervitt, borlòtt con la scigola
e poeu me ven on strangolon in gola.

Mangia pòcch, mangia quasi nient
con la panscia te tocchet el volant
te gh’hee i brasc che paren duu giambon
e te riesset nanca a schiscià on botton.

Me vedi magher, patii come on fachiro
cont i luganegh che me passen sòtta el nas
l’è ona tortura, mi manca già il respiro
el panetton el me dà minga pas.

E allora el mè conflitt de interess
el vosa: “Viva la carne e tutt el rest”
la cotoletta l’è bòna de morì
e mì la mangi de nòtt come del dì.

Mangia pòcch, uè ma mì son minga matt
mì e la mia panscia emm faa on bell contratt
chi se ne frega se el traffich l’è ingrossaa
a tì la dieta, mì gh’hoo famm e voo a mangià.

musica

chi se ne frega se el traffich l’è ingrossaa
a tì la dieta, mì gho famm e voo a mangià.