Stampa

di: Luigi Carcano - Claudio Merli
Edizioni: Brocca

 

 

E tusscòss el cambià con l’andà del temp
la se trasforma la città
i cà vègg diventen monument
che rèsten lì domà per ricordà
come l’era bèll Milan
quand l’era anmò di milanes.
El savor del temp lontan
ormai sparii sòtta el talent
del progrèss in moviment
el se vòlta nanca indree
per ben vardà i magagn
giò per tèrra su la vèggia strada
che la cambia la soa direzion.
Col progrèss che l’è mai quiètt
confus dent de sto rebellòtt
sèmm content de podè avègh
almen di bèi ricòrd.

El ricòrd de l’aria nètta
el profumm d’ona michètta
anmò calda l’hann sfornada
dal prestin su la contrada,
el progrèss de allora l’era
el sbarlus di lampedin
dent de l’ombra de la sera
per dispètt di vègg lumin.

Ma la roeuda l’ha taccà a girà
a ona velocità che fa impression
e i scopèrt se mètten ‘dree a scappà
vèrs on traguard d’on altra dimension,
tutta fada sui misur
d’on mond smanios de novità.
Ma gh’è on moster subit pront
faa de catramm e de cement.

Tant el spera de sarà Milan
in d’ona gàbbia come ona preson
tutt insèma ai monument e ai cà
domà per esaltà l’astrusità
e per ben imbottiglià
quèll che numm gh’emm anmò de bèll.
Sta gran smania del progrèss
per numm a l’è regrèss.

El ricòrd de l’aria nètta
el profumm d’ona michètta
anmò calda l’hann sfornada
dal prestin su la contrada,
el progrèss de allora l’era
el sbarlus di lampedin
dent de l’ombra de la sera
per dispètt di vègg lumin.

musica

sèmm content de podè avègh
almen di bèi ricòrd.