di: Vittorio Pinotti

Vorariom tucc comprà anca la luna,
ma la vita a l’è on gran rebellòtt
se gh’è minga on ciccin de fortuna
a sto mond se fa pròppi nagòtt,
se lavora come tanti canaja
nòtt e dì per podè guadagnà,
ma i danee fann on grand foeugh de paja
e numm restom ‘me bamba a cantà.

Se tutt’i bècch fussen lampion
pòrca sibrètta che illuminazion
se tutt’i sass fussen giambon
oh, che cuccagna per tutt’i barbon;
se tutt i pètt fussen danee
quanti miliard numm fariom col dedree,
ma l’impossibil se po’ minga fall
ciappela ‘me la ven e tira a campà.

El scior Guido e la sciora Lisètta
fann fa on bèll matriomoni d’amor
lù on bravo òmm, lee ona dònna perfètta
e graziosa compagn d’on bèll fior
lù el vantava la soa fermeria
de vèss bon de tegnìss la miee
poeu ona sera, soo nò ‘me la sia
l’haa trovada a dormì col lattee.

Se tutt’i bècch fussen lampion
pòrca sibrètta che illuminazion
se tutt’i sass fussen giambon
oh, che cuccagna per tutt’i barbon;
se tutt i pètt fussen danee
quanti miliard numm fariom col dedree,
ma l’impossibil se po’ minga fall
ciappela ‘me la ven e tira a campà.

musica

se ona canzon la fuss assee
per pagà i tass senza spend i danee,
cantariom tucc, anca i stonaa
oh, che bèll mond, ‘me sariom fortunaa
ma l’impossibil se po’ minga fall
ciappela ‘me la ven e tira a campà.