Stampa

di: Franco Francesco

 

Me son sognà de vèss on scior – [ciao Pèpp]
con tant de barca e de apparècc
la fuòriserie cont i manili d’òr
e ona bèlla villa in riva al mar – [ciao Pèpp]

Giravi el mond in longh e in largh
hotèl de lusso tucc per mì
milion a chili sbattuu in su la rolètt
de dònn ghe n’ avevi vintisètt.

Ma poeu quand me son desedaa
e son tornaa a la mia realtà:
l’hòtèl l’è on scatolon
con scritt pubblicitari, ma de carton – [ciao Pèpp].

L’è staa on sògn e son d’accòrd
on illusion de lassàa pèrd
mì de fà ‘l scior son fòrsi nanca bon
mì pòdi fà domà ‘l barbon.

Mì giri, pagà paghi nessun
perchè in saccòccia ghe n’hoo mai nanca vun,
allegher semper content
perché mì da la vita pretendi nient.

Ona salud che spacca i sass – [ciao Pèpp]
“nullatenente” senza tass
on bicceròtt, ma pròppi de quèll bon
l’è ona cuccagna, l’è ona profession
mì son content de fà ‘l barbon
de vèss nissun – [ciao Pèpp].