di: Aurelio Barzaghi

Chissà quell che se dis
se poeu l’è vera
che quand se moeur se và de là a giugà
oppur te vègn de piang quand riva sera
guardà la tèrra che l’è ‘dree girà.

Chissà se l’è ona stòria ò se l’è vera
che quand se moeur se parla col Signor?
Chissà se ‘l gh’ha la fàccia
istèss dei quader che gh’è in gir?
Chissà se ‘l gh’ha on banchètt de souvenir?

Me comprarissi la mia poltròna
e i mè sciavàtt che me scalden i pè
me comprarissi ona maja de lana
fada coi man de la mia miee;
me comprarissi ona fila de fòto
ona fila de fòto coi facc del mè fioeu
de mètt in de la stanza, la stanza de lètt
per fàmm compagnia se senti on poo fregg.

Me comprarissi ona stèlla che brilla
de quei che se ved anca senza i oggiai
e inscì se sa in dove stoo de ca!

Chissà quell che se dis
se poeu l’è vera
che quand se moeur se và de là a giugà
oppur te vègn de piang quand riva sera
guardà la tèrra che l’è ‘dree girà
e te se romp el coeur se in d’ona via
gh’è giò on quaivunn ch’ el guarda semper sù
ona vos la me ciama
me svegli de bòtt
che strani penser che se fann de nòtt.

musica