Cavèi negher - Cabaret Milano Duemila

di: Roberto Ridolfini

 

 

N’è passaa però del temp da quèlla sera
quand hoo giuraa de stà semper con tì
tì te sentii che l’era minga vera,
ma t’hee faa finta de vègh nò capii.

Mia bèlla tosa dai cavèi negher
mì te ricòrdi domà inscì
te vedi come travèrs on veder
te see ciamavet…. Soo nò se dì,
ma gh’avevi desdòtt ann appèna
e l’amor l’era ona novità
cont i dònn mì fasevi on poo scèna
me credevi de vèss on gagà,
ma con tì tutt’ i ròbb hoo sbagliaa
son staa stupid quand mì t’hoo lassaa
m’è restaa tra i regòrd pussee bèi
solament el color di cavèi.

Son restaa de per mì, l’è pròppi vera
per tròpp vòlt me son sbagliaa a cercà l’amor
e adèss mì troeuvi minga la manera
de tiràss via dai oeugg sto bèll color.

Cerca

Facebook!