di: Vittorio Pinotti

Cantonscèll del mè Milan
te pensi con grand nostalgia
poeu senti el coeur che ‘l voeur s’cepàss
per la malinconia.
Lì mì son cressuu, ma poeu la pòrta che l’era la mia
quanti facc noeuv gh’è rivaa
ormai tusscòss gh’è cambiaa,
quèi che me voreven tanto ben hinn tucc andaa.

E l’era inscì bèll desedàss tutt’i dì
tra ortolan che vosava, frustad di brumista
e trombètt di taxi,
e l’era inscì bèll casciass là in d’on canton
taccaa a ona finèstra e sentì on organin
che ‘l sonava i canzon.

Cantonscèll del mè Milan
te pensi con grand nostalgia
poeu me senti el coeur che ‘l voeur s’cepàss
per la malinconia.
Quand di vòlt mì passi là denanz al porton de cà mia
pensi: l’è inutil fermass
me conossen pù nanca i sass.
Poeu sto lì ‘me on bamba a guardà in su e a ricordà.

Mì seri on fiolin col coeur pien de passion
quand sentivi on armònica in strada a sonà
me vegniva el magon
piangevi de spèss e cercavi el papà
poeu vegniva el nonètt a portamm on poo al parco
e tornavi a giugà.

musica

Quanti vòlt mì passi anmò denanz al porton de cà mia
ma la mia gent la gh’è pù, quèsti mì i hoo mai conossuu.
Cantonscèll del mè Milan indree se torna pù.
Tornà indree se po’ pù tornà indree se po’ pù.