di: Nino Rossi

Dòpo ona longa nòtt, scura e silent,
el ciel el se fa ross a l’orizzont
e don de la natura risplendent,
el dì noèll el nass sul nòster mond.

Bòn dì al commendator pien de milion,
bòn dì al pòver Crist coi pèzz in su i calzon,
a la vertenza in cors che mai la moeur,
tra quèi che gh’ha i danee e chi je voeur.
Bòna giornada ai pòver ignorant,
on dì felis ai sciori de talent,
a quèi che fann bèll ved, cont i difètt
e quèi che coi virtù paren scarp ròtt.

Per ògni dì che l’è diventaa “ier”
on alter dì el diventarà “doman”.
Pò diventà ona realtà on penser,
se el dì che ‘l riva el te darà ona man.

Bòna giornada a quanti fann nagòtt,
felice dì a chi sgòbba come matt,
a quèll semper rabbiaa per i sò guai
e a quèi di alter el ghe pensa mai.
Bòn dì al piangina che l’è mai content,
a quèll che ‘l se lamenta mai de nient,
tant, se gh’è volontà, l’è inutil piang,
el dì che riva el pòrta on’altra “chance”.