Stampa

di: Giorgio Seropian

 

 


-) Ciao Mario!
-) Varda chi gh’è rivaa! Ciao Bauscia, a l’è on bèll poo de temp che te se fee nò vedè. ‘Me la và?
-) Lassom pèrd, 'me hinn capitaa inscì tanti… de tutt’ i color. Famm bagnà el bècch cont on bianchin spruzzaa, poeu te cunti.
-) Silenzi, el Bauscia el cunta!

El giovedì passà sul reoplan seri in viagg da ona mèzz'ora
andavi dal mè nòno Sebastian ch' el sta de cà a Timbuctu
quand l’hostess col micròfon la dis “Sentii bèlla gent niente paura”,
ma mì gh’hoo l’impression ch’el aeroplan el vaga innanz tutt de per lù

el comandant ier sera l’ha pacciaa on baslòtt de verz con la cazzoeula
e insèma al sò aiutant in la cabina vann adree a trà sù 
gh’è nò quaivun ch’el sappia fà ‘ndà sta bagnaroeula?
Se de nò andarèmm tucc a gamb per ari e a cà se torna minga pù».

La gent per el scaggètt la salta in pee ‘me fuss s’cioppaa ‘na bomba
mi son restaa settaa bèll quiètt a leg la Gazzètta dello Sport.

Beeeebooop! Bauscia
l’inguria l’era gròssa,
ma pròppi gròssa gròssa
e giò sti fètt!
Bauscia
l’inguria l’era gròssa,
ma pròppi gròssa gròssa
e giò sti fètt!

Mì salti sù e ghe disi che a Milan mì guidi el filobus novanta
che passa de Lorètt e che fa tutta la circonvallazion,
a guidà on aeroplan la differenza la sarà poeu minga tanta
ve giuri sul mè coo che san e salv ve portaroo a destinazion.

Me sètti giò a la guida del aeroplan ma rièssi minga a trovà el cambi
se ved nanca el volant e ‘l fren a man chissà in che sit l’avarann casciaa
gh’hinn parècc manètt, orelògg e barlafus tanto strambi
che me ciappi on bèll stremizzi ma on'idea speri che la me vegnarà.

De bòtt schisci on botton, “automatich pilòt” gh’è sù scritt:
de bòtt el aeroplan el fila drizz e dòpo on'ora sèmm rivaa.

Beeeebooop! Bauscia
l’inguria l’era gròssa, 
ma pròppi gròssa gròssa 
e giò sti fètt!

Bauscia
cascia minga i ball.
Bausciaaaaaa ….. Bop!