di: Giorgio Danese

El tramont dove pò speggiass
el sorris, el ricòrd d’ona dòna
quanti lacrim buttaa su l’asfalt
la tristezza in del coeur che risòna;
in del lett senti anmò el sò profumm
me rigiri, gh’hoo pù la speranza
mangi pù, dòrmi pù, che torment,
l’haa tradii tutt el mè sentiment.

Ave Maria, mama del Signor
anmò on miracol,
mandom via el dolor
ormai l’è nòtt
el mè coeur l’è a tòcch
e soo nò 'se fà 
stringi el cossin e me vègn de piang,
ma che brutt destin.
Ave Maria, mama del Signor
mì te ringrazi e te mandi on fior
i tò paròll m’hann faa capì
che anca l’amor l’è come on sògn
che ‘l pò svanì.

L’è difficil però rassegnass
comincià on’altra vita in salida
e cercà pian pianin de capì
che oramai l’è ona stòria finida;
in del lètt senti anmò el sò profumm
me rigiri, gh’hoo pù la speranza
mangi pù, dòrmi pù, che torment,
l’ha tradii tutt el mè sentiment.

musica

Ave Maria, mama del Signor
mì te ringrazi e te mandi on fior
i tò paròll m’hann faa capì
che anca l’amor l’è come on sògn
che ‘l po’ svanì.