di: Gianni Bambozzi

Gh’è chi dis che la giornada
la pò nò vèss consumada
senza corr des or al dì, ma che straccada;
gh’è chi dis che la fadiga
chì de numm la riva prima
prima anmò che canta el gall a la mattina.

E già ne pòdi pù,
ma cossa che gh’hoo de dì
se la giornada di milanes l’è fada inscì.

Levà sù a la mattina
a la sveglia on’ oggiadina
me vestissi col cervèll anmò in cantina
con ‘na man 'na pettenada
con la barba mèzza fada
e giò di scal, oh Signor, la portinara!

E già ne pòdi pù,
se la me cunta sù
che la soa tosa la gh’ha el moros che la voeur pù.
E già ne pòdi pù,
ma cossa gh’hoo de dì
se la giornada di milanes l’è fada inscì.

musica

Poeu de corsa a la fermada
de la metropolitana
sul vagon gh’è pien de gent,
ma che schisciada
finalment a salti foeura
da l’uscita dòpo on’ora
e ancamò de corsa con la lingua foeura.

E già ne pòdi pù,
per quèll che gh’hoo de fà
gh’è ‘l capp repart in su la pòrta on poo incazzaa.
E già ne pòdi pù,
ma cossa gh’hoo de dì
se la giornada di milanes l’è fada inscì.

Poeu comincia la menada
su e giò per ona scala
poeu gh’è i fax de consegnagh a l’impiegada
poeu me disen che 'l Pasquale
l’è staa a cà perchè el “sta male”
va finì me tocca fà anca 'l manovale.

E già ne pòdi pù,
per quèll che gh’hoo de fà,
ma finalment quand riva sera torni a cà.
E già ne pòdi pù,
ma cossa gh’hoo de dì
se la giornada di milanes l’è fada inscì.
E già ne pòdi pù,
ma cossa gh’hoo de dì
se la giornada di milanes l’è fada inscì.