di: Valter Valdi

La sarà fòrsi ona stòria, la sarà quèll che sarà,
ma imparèmela a memòria, var la pèna de ascoltamm…

L’era on barbon, l’era on barbon de la Baròna
innamoraa, innamoraa d’ona barbòna
barbòna lee e barbon lù
s’hinn guardaa in di ball di oeugg e s’hinn piasuu.
Lee l’ha dii “sì”, lù l’ha dii “sì”
s’hinn guardaa dent’ in del coeur e s’hinn capii.
Ma per la prèssa de sposass
hann finii per desmentegass
del sior curaa e chi l’ha faa.
Lù l’ha strengiuda contra lù
lee l’ha strengiuu contra de lee
hinn diventaa marì e miee.

E l’è staa inscì che sòtta el pont de la Baròna
intant che ‘l passava sora el coo el Milan-Tortòna
nas conta nas, pee contra pee
lee scaldava lù e lù scaldava lee.
Hann saraa i oeugg per sognà el mar
poeu hann boffaa tutt ‘duu sui stèll
…. e hann smorzaa el ciar.
Ògni nòtt el sant uffizi, quèll su in scima al mond de là
el manda i sant a fà i servizi de cercà chì el fa peccaa. 

E l’è staa inscì che san Giovann, lù de persòna
passaa in de ronda sora el ciel de la Baròna
l’ha guardaa-giò e l’ha dii inscì:
chi duu lì sògnen el mar ‘me ‘l sògni mì.
Senza l’okkei el scior curaa
ma puttòst ‘sti duu malnatt s’hinn dree a fà?
Con sù el cappell de carneval e calzamaglia per slargà i al
se sbatt in bas a ris’c de mazzass.
Rimuginando in del crappon
quèsti bamba de barbon
fai brustolii in del calderon…

Ma ona vosètta collega d’ona santòna
la vosa giò: “Giovann venn ‘dree, fà nò el carògna
per satanaa i grand porcasc
va a cercai in mèzz ai pioeugg nò in mèzz ai strasc.
Lassi sognà, fortunaa lor
ubbidis, mì son la mama del Signor”.

L’è andaa a finì che sòtta el pont de la Baròna
a la mattina i dù barboni, barbon e barbòna
con el desedass ai quatter vent
hann trovaa là duu anèi de spos d’òr e d’argent
e su on bigliètt gh’era scritt sù:
l’è on regal de la Madòna per tucc e duu.