di: popolare

Hoo incontraa ona cèrta tizia, in on trani in via Verzee
hoo tiraa l'ora propizia, son ‘ndaa su in cà de lee.
Sul pussee bèll che cicciaravi là in sul lètt insèma a lee
hoo sentuu on òmm ch'el ciamava, el piccava incontr a l'usc.
Allora lee tutta stremida, "Oh dio mio, gh'è el mè marì,
salta foeura de volada, se de nò, povera ti".

E mi in camisa, col frègg che faseva,
son saltaa foeura che i dent me batteva
me son casciaa sòtta al lett addirittura,
Oh, che paura, ohej che paura.

La ghe dèrva lu el ven denter, la furbòna la ghe fa
a gh'hoo on gran dolor de venter, và giò a toeu el bicarbonaa.
Lu el ghe dis, l'è ona cialada, te gh'avree on poo de calor
'dess te foo ona limonada, passerann tutt i dolor.
Hoo sentuu che lu el cercava, i bruchitt insèma a lee
e mì, pòrco d'on sciampìn, a barbellavi da cap a pee.

E poeu sentivi tutt quèll che diseven,
e poeu sentivi anca tutt quèll che faseven
mentre i mè pee e i mè gamb se gelaven,
lor se scaldaven, lor se scaldaven.

Hoo sentuu che lu el cercava, l'orinari lì per lì
hoo sentuu che le cercava, pròppi indoe seri mì.
Ad on tratt el pee el me ciappa, el tira fòrt invers a lù
mì me sposti el pee el ghe scappa, el va a finì coi gamb in sù.
Mi pregavi e lù el vosava, e tremavi 'me on berìn
dal baccàn che se faseva, s'hinn svegliaa tutt i inquilìn.

Hinn cors de sora, tutt quant de premura,
òmm, dònn e fioeu, in camisa addirittura
m'hann pestaa sù come 'na cotolètta,
Oh che disdètta, oh che disdètta.

La mia diseva de spèss la mia nòna,
del pròssim tuo rispètta la dòna
e mì crapon che l'hoo minga ascoltada,
...a l'hoo ciappada... la re-me-nada.