di: El barberin (Italo Corrias)

L’amor l’è ona paròla
con cent significaa
come l’arcòbaleno
i sfumadur che ‘l gh’ha
l’amor per ona dòna
el pò diventà velen
per i fiolin l’amor l’è tanto ben.
L’amor, l’amor del pròssim
incoeu el gh’è nanca pù
te bòrlet giò
nissun te tira sù.

L’amis l’è la persòna
che la dis mai de nò
che la te fa on sorris
quand el moral l’è giò
l’è quèll che per difendet
el ris’cia de morì
el va in galera lù per tì,
ma in de la mia esperienza
de vita che hoo vissuu
de amis inscì
mì ghe n’hoo mai avuu.

On dì, ma senza accòrges
se troeuvom chì a pensà
che gh’è passaa ona vita
con gran velocità
l’infanzia l’è confusa
se la ricòrdom pù
però gh’è restaa imprèssa la gioventù,
ghe ven la nostalgia
on gran sospir e poeu
ritornom ai penser del dì d’incoeu.

Se fussi on grand artista
on tipo original
dotaa de fantasia
del tutt particolar
on gran maester
in del combinà i color
mì pocciaria el pennèll su tutt i fior
faria de l’arte pura
che la me fioriss dai mont
el quader pussee bèll del mè Milan.