di: Renato Brioschi (dei Profeti)

Son vegnuu-sù fra la strada e ‘l bar Olimpia
coi mè amis e on mucc de disperaa
andavi a scòla per tri dì e trenta minga
e ‘l mè pà el m’ha sbattuu foeura de cà.

Col Ciletti, con l’Osvaldo e ‘l Nazareno
che de musica capiven quasi nient
èmm cominciaa a sonà ona sera al Mediolanum
gh’era nissun, ma dòpo on poo l’era pien de gent.

E da allora l’è mai finida l’avventura
on’altalèna de succèss e de dolor
e a pensagh sù ora l’è stada dura
e tornaria indree nò de sicur.

Ma gh’hoo anca in ment di bèi ricòrdi
de bèi canzon, de bèi tosann
e quanti amori, quanti ricordi
e me par nò che gh’è volaa via quarant’ann.

….

e me par nò che gh’è volaa via quarant’ann
anca se mì me senti addòss anmò vint ann.