di: Nino Rossi

Fussi scalpèll de fama, dotaa de bon talent,
per esaltà la giòia dei tanti bèi moment,
me piasaria scolpì, in on blòcch de marmo ròsa,
a simbol de l’amor, on’immagine de tosa.

Milanesina bèlla ‘me la nev,
mòrbida come nèbbia novembrina,
‘na bocca che felice chi la bev,
frèsca ‘me l’acqua viva fontanina.
El coeur el va in freguj d’arcobalen,
quand tì te me bisbigliet, in sordina,
“Se te savèsset ‘me te voeuri ben”
con l’alit che el par brèzza mattutina.

Fussi pittor, inveci, maester de color,
la mèttaria su tela, a somiglia on bèll fior.
Perchè in di mè penser, pussee che Mònna Lisa,
simpatich, sorrident, gh’è on bèll faccin de tosa.

Milanesina bèlla ‘me la nev,
mòrbida come nèbbia novembrina,
‘na bocca che felice chi la bev,
frèsca ‘me l’acqua viva fontanina.
El coeur el va in freguj d’arcobalen,
quand tì te me bisbigliet, in sordina,
“Se te savèsset ‘me te voeuri ben”
con l’alit che el par brèzza mattutina
come te voeuri ben, milanesina.