Milanes in barchètt - Cabaret Milano Duemila

di: Nino Rossi

 

Ai temp di navigant de Boffalòra,
studios de fantascienza l’hann predii
che on dì el “Gamba de lègn”, coi vint a l’ora,
el vègg barchètt l’avria faa sparì.
Tant’acqua l’ha portaa in città el Navili,
da quand in su la luna sèmm rivaa,
eppur, sarà per sfizi ò per puntili
a settass giò in barchètt sèmm ritornaa.

Come sul barchètt de Boffalòra
col liron liron lirela,
‘das ‘dasiòtt vèmm a Milan.
Tanta, chi se cascia se ven sera
quand te par che la natura
la te sfiora con la man.
Su ona sponda e l’altra del Navili,
passa tanti meravili
che sparissen poeu man man.
Come sul barchètt de Boffalòra
che el va giò liron lirela,
vèrs Milan, liron liran.

L’è pròppi sul barchètt de Boffalòra
che on ufficial Asburgich l’ha incontraa,
la Pitturoni nobildònna Flòra
e che per lee de spada l’ha duellaa.
De l’epoca romantica passada,
te vedet su i dò spond tanti moment,
parchi e villètt, per casta rinomada,
lassaa in ricòrd ‘me stòrich document.

musica

Su ona sponda e l’altra del Navili,
passa tanti meravili
che sparissen poeu man man.
Come sul barchètt de Boffalòra
che el va giò liron lirela,
vèrs Milan, liron liran.
Come sul barchètt de Boffalòra
che el va giò liron lirela,
vèrs Milan, liron liran.

Cerca

Facebook!