di: Carcano; Merli

On foeuj de carta e lapis in di man,
con l'intenzion de scriv ona canzon
cont i argoment che pòden mètt Milan
desora di concètt di novità.

Ma ciombia oej! L'è pròppi nò de rid!
La novità nostrana di poètta,
a l'è vegnuda in ciar, però domà per lor.
Allora mì i canzon ie scrivi pù?
Ma poeu perchè minga tentà?
Voeur dì và ben, se la gh'ha i gamb...
la gh'ha de 'ndà!
Se pòdi scriv cos'è del come e del perchè,
Milan a l'è la barca di cojoni?
Oppur perchè a Milan a gh'è i poverètt
che tiren el carètt mattina e sera?
Gh'èmm anca i "vu comprà" che vègnen chì a cercà
l'America... che pròppi la gh'è minga.
Milan l'è on pòrt de mar
che slonga la soa man
per chì ghe pias sognà ch'el mond el cambia.

On alter foeuj e on alter dì l'è 'ndaa!
Tangent di delinquent a San Vittor.
a l'è per lor ch'el coeur del nòst Milan,
adèss l'è diventaa on tòcch de giazz.
Milan col coeur in man ... me ven de rid!
Milan di tradizion l'è on vègg teater.
Busècca al giovedì, merluzz de venerdì
usanz d'on temp passaa ormai sparii.
Milan d'incoeu l'è già doman...
se 'l mond el và cont el progrèss...
a l'è on succèss!
Milan cont i danee, Milan di forestee,
de milanes arios in sul navili.
Milan di mèzz calzett, tosann che fann marchètt,
liggera e galantomm in visibili.
Progrèss in del cassètt
con alter bèi giughètt...
va ben tuscòss, ma quand ghe pensi a sora
mì corri in sù i bastion
per fà on'indegestion
de aria de Milan, che l'è cà mia!

musica

Progrèss in del cassètt
con alter bèi giughètt...
va ben tuscòss, ma quand ghe pensi a sora
mì corri in sù i bastion
per fà on'indegestion
de aria de Milan, che l'è cà mia!