di: W. Di Gemma

Sarà, ma mì la luna
la me fa on grand effètt
e quand gh’hoo mì la luna
la guardi dal mè lètt.
L’è là dedree al mè veder
dipinta sora ‘l ciel
che la fa compagnia
a tutt i mè penser.

L’è on oeugg che ‘l guarda el mond
quand che l’è adree a dormì
adasi poeu el se sara
per fà rinass el dì,
ma mì t’hoo vist istèss
perchè son come el dì
el mond el scruti semper
de nòtt el foo con tì.

Damm semper la toa lus
s’ te pòdet tutt i ser
nel ciel a te me paret
on rizzol de butter.
Hinn dree a sarass i oeugg
adasi con l’ombria
se vedom doman sera
la nòtt l’è adree a andà via.

musica

Se l’òmen el fudèss nò
vegnuu giamò in de tì
senza pensagh a sora
el primm saria staa mì,
ma fòrsi l’è mèj inscì
quand te me stee lontan
per minga fà morì i sògn
del mè doman.

Damm semper la toa lus
s’ te pòdet tutt i ser
nel ciel a te me paret
on rizzol de butter.
Hinn dree a sarass i oeugg
adasi con l’ombria
se vedom doman sera
la nòtt l’è adree a andà via.