di: Marco Candiani; Claudio Merli

La spettavi là in fond a la strada,
la vedevi rivà come in sògn;
se tegnevom per man fin a sera
e parlavom de gesa e benis.
Serom fioeu che sperava in la vita
me duu spos gemò pront per trii fioeu,
e mettevom de part on quei mila
per la cà, la mobilia e l’anèll.

Va ‘me se voeuren ben, diseven tucc
e se vorevom ben, ma ben de bon.
Se l’era lì con mì vedevi el sô
e in del stèss temp vedevi luna e stèll.
Spettavom domà el dì de ingenogiass
sora l’altar mì e lee col sò vel bianch.

Gh’era pront dò stanzett a la Baia
cont el nòster navili lì arent,
dò stanzètt su ‘na cort de ringhera
quand mancava domà quatter dì.
Quatter nòtt, ma ona vos la me ciama:
“Dai Richètto, vestisset, corr giò,
hann trovaa in del Navili ona tosa…”
quanta gent sù la riva stanòtt!

Me l’hann tirada su denanz a mì
e gh’hoo spartii i cavèi tucc masaraa,
gh’hoo disquattaa el faccin e … l’era lee.
Mancava quatter dì e quatter nòtt!
Me l’hann portada sù in di stanzètt
e gh’hoo poggiaa dessora el sò vel bianch.

L’hoo basada per l’ultima vòlta
come quand serom sòtta el porton,
quand andavi a toeula a bottega
e in di strad la tegnevi per man.
Dèss son chì in d’ona stanza sarada;
gh’è ona cros inciodada sul mur
col Signor ch’el me guarda, el me fissa,
preghi on poo… e me par de morì.

musica

De nòtt me insògni anmò semper de lee
e d’on vel bianch ch’el vola in de la nòtt.
M’hann ligaa perchè parli e straparli
d’on Navili quattaa de benis
che scarlighen lontan de la Baia…
vosi e piangi… e me par de morì!