di: Giovanni D'Anzi

L’hoo incontrada a ona fèsta de sera
che sola solètta l’andava vèrs cà;
l’era tutta vestida de seda
e quand m’el ricòrdi me par de sognà.
Nel guardala in di oeugg on moment
me son miss a tremà de spavent.

Mariolina de Pòrta Romana
quand la sera te vedi passà
senti ‘l coeur che ‘l me batt a campana
senti i gamb che se lassen andà;
mì te segui per tutta la via
con duu oeugg che te voeuren mangià
Mariolina che malinconia
mì gh’hoo minga el coragg de parlatt.
Mangi pù, dòrmi nò
Perchè tì ‘sti ròbb chi ti a see nò
Oh Signor, dighel tì
perchè mì già me senti morì.

L’alter dì sul conton l’hoo fermada
gh’hoo dii: “Mariolina te devi parlà”.
Sul principi la fa la seccada:
“Gh’hoo tanta premura, mì devi andà a cà”.
Dòpo on ora se davom de tì
e da allora la spètti ògni dì.

Mariolina de Pòrta Romana
quand la sera te vedi spuntà
senti ‘l coeur che ‘l me batt a campana
perchè el canta de felicità;
Mariolina soo nò se faria
per conoss la toa mama e ‘l papà
voeuri digh che te see tutta mia
Mariolina te voeuri sposà.
Bèll bambin, bèll belee
fòrsi tì te saree mia miee
e farèmm tanti fioeu
a la barba de chì gh’haa i cagnoeu.