di: Walter Di Gemma

Maga Maguglia la viv sora el Dòmm
in mèzz ai statui de sant e patrònn
quand ven la sera la tira giò i stèll
e voeuna a voeuna ie tacca al cappèll.
Nissun l’ha mai conossuu la soa età
l’òmm che l’ha vista per ultim l’è staa
on gran monarca che adèss el gh’è pù
che i nòster avi ciamaven Artur.

Maga Maguglia coi sò man al ciel
la spòsta i nivol e la quatta el seren
la dèrva on liber inscì impolveraa
che tutt Milan in on bòtt l’è quattaa.

Sgrisor de frègg, vent de sospir
polver di tècc, lus de San Sir
coeur de poètta, acqua de chì
perchè la nèbbia la se fa inscì.

Maga Maguglia l’è
Maga Maguglia l’è
Maga Maguglia l’è
Maga Maguglia l’è.

Maga Maguglia de nòtt sora el Dòmm
la ciama i santi, beati e patrònn
anca l’Adamo, el Giacòbbe e l’Isacch
ciappen la nèbbia, impienissen i sacch.
Prima i beati la nètten per ben
i santi insèma la pòggen sul fen
anca i patrònn fann la benedizion
perchè la faga del mal a nissun.

Maga Maguglia la numera i sacch
ie fa su anmò con la carta de pacch
i angiolitt pensen a la spedizion
per soddisfà tutt i ordinazion.

Turin, Trevis
New York, Paris
Tokio e Bruxelles,
Ròma, Fòrlì
in tutt el mond ormai le sann
per fà la nèbbia ghe voeur Milan.

Maga Maguglia l’è
Maga Maguglia l’è
Maga Maguglia l’è
Maga Maguglia l’è. 

Maga Maguglia col sô la spariss
in ona nivola de fumm e de gris
e a pòcch a pòcch la saluden i stèll
che se distacchen anmò dal cappèll.
Passen i dì, or, minutt e stagion,
ma l’è sicur che in la luna d’autunn
el vent el riva sul Dòmm a sfojà
anmò quèll liber inscì impolveraa.

Sgrisor de frègg, vent de sospir
polver di tècc, lus de San Sir
coeur de poètta, acqua de chì
perchè la nèbbia la se fa inscì.

Maga Maguglia l’è
Maga Maguglia l’è
Maga Maguglia l’è
Maga Maguglia l’è.