di: Carcano L.; Merli C.

Mattina bonora, quand nass el sô,
in genoeuggion vestii a la carlòna,
el sègna cont el gèss sul marciapee
i lineament gentil d'ona Madònna.

Me fermi on moment, ma gh'hoo de 'ndà
perchè l'è tardi, devi andà a bottega.
Ma son curios de rivedè stasera
quand torni a cà el disègn bèll de vedè.

Madonnina colorada
stà lì sul marciapee
fin ch'el temp el te scancèlla
da i oeugg de la toa gent.
Se on queivun te passa sora
ti perdònell, perchè
el ved minga la bellèzza
di Madònn sul marciapee.

Mattina bonora d'on dì che pioeuv,
cammini riparaa sòtta la gronda,
e ‘sto bèll disègn che l'è deslenguaa
l’è diventaa 'na smaggia brutta e sporca.

Destin de Madònna sul marciapee,
de viv domà in del temp per vèss guardada,
poeu l'acqua che l'inonda la contrada,
la pòrta in del tombin insèma a lee.

Madonnina colorada
stà lì sul marciapee
fin ch'el temp el te scancèlla
da i oeugg de la toa gent.
Se on queivun te passa sora
ti perdònell, perchè
el ved minga la bellèzza
di Madònn sul marciapee.