di: Popolare

On dì per ‘sta contrada passava on bèll fioeu
e on mazzolin de ròs l’haa traa in sul mè poggioeu
l’haa traa in sul mè poggioeu
l’haa traa in sul mè poggioeu.

E per trii mes de fila e squas tutt i dì
el passeggiava semper domà per vedèmm mì
domà per vedèmm mì
domà per vedèmm mì.

Vegnuu el cinquantanoeuv, che guèrra disperada
e mì per ‘sta contrada l’hoo pù veduu a passà
l’hoo pù veduu a passà
l’hoo pù veduu a passà.

On dì, pioveva, vèrs sera s’cioppavi del magon
quand m’è rivaa ona lèttera col bòrd de condizion
col bòrd de condizion
col bòrd de condizion.

Scriveva la sorèlla del pòver Luisin
che l’era mòrt in guèrra de fianch al castellin
de fianch al castellin
de fianch al castellin.

Hinn già passaa trii ann, l’è mòrt, el vedi pù
eppur ‘sto pòver coeur l’è chì ancamò per lù
l’è chì ancamò per lù
l’è chì ancamò per lù.