di: Giorgio Mangano

Gh’è on’osteria unica nel mond
con tanti amis allegher spensieraa
savè se l’è visin o l’è lontan interèssa minga
là gh’è el coeur del nòst Milan.

L’è l’osteria de l’amicizia
e quèll che cunta incoeu l’è vorèss ben
on’ora insèma l’è ona delizia
gainn, conili, amis e odor de fen
ona bevuda, ona bèlla cantada
minga de scrèzzi, penser, dolor, impègn
el mond l’è in guèrra,
l’è tutta ona bugada,
ma numm se vedom domènica che vègn.

I bòcc hinn fermi, i cart hinn del cassètt
i bottiglion hinn voeui, gh’è pù nissun
juke-box e biliardin fann pù baccan,
ma nel silenzi canta el coeur del nòst Milan.

L’è l’osteria de l’amicizia
e quèll che cunta incoeu l’è vorèss ben
on’ora insèma l’è ona delizia
gainn, conili, amis e odor de fen
ona bevuda, ona bèlla cantada
minga de scrèzzi, penser, dolor, impègn
el mond l’è in guèrra,
l’è tutta ona bugada,
ma numm se vedom domènica che vègn.

musica

on’ora insèma l’è ona delizia
gainn, conili, amis e odor de fen
ona bevuda, ona bèlla cantada
minga de scrèzzi, penser, dolor, impègn
el mond l’è in guèrra,
l’è tutta ona bugada,
ma numm se vedom domènica che vègn
saludi tutti e foo ona ziffolada
amis, se vedom domènica che vègn.