di: Claudio Merli

El te riva in del coeur con la sera,
l’è in de l’aria che boffa leggera,
l’è ‘l rigòrd di tò gent che viveven content
in del coeur d’ona cà de ringhera.
Te ritornet in scòssa a la nònna
per riviv i bèi moment de gioventù.

Su la ringhera, sì…
che me piaseva viv
content in amicizia con la gent modèsta,
pròppi come mì.
Su la ringhera, tì…
te me daa ‘l primm basin,
el coeur el me s’cioppava, in de la nòtt serèna,
lì vesin vesin.
Voeuri ricordà ona cà de ringhera
del mè vègg Milan pròppi come l’era.
Su la ringhera mì
mì voraria tornà
tra la mia gent sincera, con la mia popòla,
per podè sognà.

Sto bèll sògn che ògni tant me tampina
l’è l’amor per la gent meneghina,
che la pòggia el sò coeur
sora al s’còss d’on poggioeu,
faa de fèrr, d’ona cà de ringhera.
E la gent meneghina la sògna
de riviv i bèi moment de gioventù.

musica 

Voeuri rigordà ona cà de ringhera
del me vègg Milan, pròppi come l’era.
Su la ringhera, sì…
el torna el meneghin,
tra la soa gent nostrana, con la soa ghitara,
quèst l’è ‘l sò destin.
Nel bèll Milan che l’era,
su la soa ringhera…
a l’è ‘l sò destin.