di: Teka P

On dì de glòria l'era rivaa
quand tucc i alter eren partii:
mì, domà mì, hoo cognossuu
el disonor de restà chì.

Mì son 'me l'èrba matta,
brava gent, brava gent:
l'è inutil mettom l'òli per condimm in insalata!
La mòrt l'ha ciappaa i alter,
brava gent, brava gent,
la m'ha faa grazia a mì:
l'è minga giusta, ma l'è inscì.

Me piasaria savè 'l perchè
ve da fastidi vedèmm in pè.
Me piasaria savè 'l perchè
ve da fastidi vedèmm in pè.

I dònn hinn faa 'me disen lor
per stà settaa giò a spettà l'amor:
mì gh'hoo 'n donnin che 'l spetta nò,
l'è in via Verzee che la va su e giò.

Mì son 'me l'èrba matta,
brava gent, brava gent:
l'è inutil mettom l'òli per condimm in insalata!
Lee la se vend ai alter,
brava gent, brava gent,
la se regala a mì,
l'è minga giusta ma l'è inscì.

I omen vann in gir per el mond
semper insèma, come cavron;
mì inveci nò, stoo indepermì,
mangi de grassa anca el venerdì.

Mì son 'me l'èrba matta,
brava gent, brava gent,
l'è inutil mettom l'òli per condimm in insalata!
Mì son 'me l'èrba matta,
brava gent, brava gent,
e crèssi in libertà,
adree ai panchètt e in mèzz ai praa.

Me piasaria savè 'l perchè
vorii schisciamm sòtt ai voster pè!
Me piasaria savè 'l perchè
vorii schisciamm sòtt ai voster pè!

Me piasaria savè 'l perchè
ve da fastidi vedèmm in pè.