Stampa

di: Mangano; Maiolo

 

 

Ona giornada tevedina
in sul poggioeu gh’è ona farfalla
scolti la radio: l’è ona bellèzza
s’hinn miss daccòrd: gh’è pù la guèrra.
Passen i tramm tucc in orari
sbarbaa in pee, vègg settaa giò
leg el giornal l’è ona bellèzza
ghe su la Nòtte in cronaca nera.
Me son svegliaa e m’è vegnuu la luna
la realtà, el soo, l’è minga inscì.

La nòtt l’è ciara, profumada
finèstr avèrt, senza paura
scolti la strada: l’è ona bellèzza
vègn sù la vos d’ona ghitarra.
In su la darena odorosa
òmen e dònn a hinn allegher
scolti i paròll, l’è ona bellèzza
hinn tucc amis, gh’hann minga prèssa.
Me son svegliaa e m’è vegnuu la luna
la realtà, el soo, l’è minga inscì.

Dent’ ona scòla milanesa
i nòst’ bagai vestii a fèsta
scolti i discors: l’è ona bellèzza
‘na lingua sola: la meneghina.
In su i vial visin al parco
la te fa el vèrs ona battòna
solti la vos: l’è ona bellèzza
l’è minga on òmm, ma l’è ona dòna.
Me son svegliaa e m’è vegnuu la luna
la realtà, el sèmm, l’è minga inscì
sari sù i oeugg, l’è l’unica manera
cred e sognà che ‘l temp el s’è fermaa.

E fòrsi el sògn sarà la realtà.