di: Walter Valdi

L’andeghee del vintiduu in via Broletto ormai el gh’è pù
perchè l’era on pistòla:
sèmm andaa de lù a robà, ma lù l’ha taccaa a vosà
e gh’è toccaa fall foeura.

Bisognava fall sparì, el Lino el fa: “Ghe pensi mì”
l’ha caregaa sù in spalla;
poeu l’è andaa, numm sèmm scappaa
però quand se sèmm trovaa l’è restaa lì ‘me on ciolla.

“Ohei Lino: indoe t’hee miss el mòrt?”
gh’èmm domandaa tucc insèma.

“Ma ragazzi, soo nò come divel, ma
el fatto l’è che l’hoo perduu”

“Com’è Lino: t’hee perduu el mòrt? ‘me se fa a pèrd on mòrt?” 

“Ohvei ragazzi, son minga adree a scherzà:
mòrt l’era mòrt, l’ho vist mì, v’el giuri,
ghe l’avevi in spalla…
L’hoo lassaa giò on moment per via che dovevi fà ona ròba contra el mur
che adèss pòdi minga dilla, me son voltaa… el gh’era pù”.

“Ma pòrca galera, Lino…!”

Per cercà de rimedià èmm ciappaa e sèmm tornaa
sul luogo del delitto
l’era tutt pien de pollee, sèmm scappaa, ma lor adree
giò per la via Broletto.

El Lino poeu l’ha faa on pastiss
in d’ona curva l’è andaa drizz
el s’è impastaa ‘me on ciolla
èmm faa in temp nanca a dì “beh”
gh’è rivaa adòss i pollee e gh’hann menaa in questura.

“Allora Lino, vogliamo dire dove abbiamo messo il cadavere del morto?”
el gh’ha domandaa el commissari.

“Ma scior commissari, soo nò come dighel,
ma el fatto l’è che l’ho perduu”.

“Che niente e niente volessimo sfrucugliare ah…?”

“Ma nò, l’è nò question de sfrucugliare: mòrt l’era mòrt,
son minga adree a dì de nò: ghe l’avevi in spalla…
L’ho lassaa giò on moment per via… per via del mur
me son voltaa…. el gh’era pù”.

“Ah, e io vi mando sotto processo per omicidio,
per rapina a mano armata e per occultamento di cadavere!”.

Fòrsi chì on quaidunn le sa come hinn dur de fà passà
vintòtt ann de galera
numm giugavom semper ai cart,
ma ògni tant pensavom al mòrt: pareva minga vera…

L’è per quèll ch’èmm cominciaa a cercà de fà parlà
chell brutt balord del Lino
però on dì èmm piccaa tròpp fòrt
fatto sta che lù l’è mòrt: l’è borlaa giò ‘me on sass…

Gh’è rivaa giò el direttor de la galera
el ghe guarda, el ghe fa:
“Allora ragazzi, non facciamo scherzi: tirate fuori il cadavere del Lino”.

“Com’è? L’era chì adèss…
Lino, Lino, Lino indoe te seet andaa a casciass?.....
Direttore: èmm perduu anca lù”.

“Ah! E io vi mando sotto processo un’altra volta
e vi faccio prendere altri trent’anni di galera!”.

E difatti l’è staa inscì, anmò trent’ann denter chì
a tirà giò madònn
senza nanca giugà ai cart sì, perché
el trii sètt col mòrt l’è on gioeugh che ‘l me va nò.

Numm sèmm semper lì al tavolin
cont i man taccaa visin per fà vegnì giò el Lino.
Lino, dai, fà nò el triipè, picca on colp se te ghe see:
indoe t’hee miss el còrp?

“Lino, Lino dai fa el bravo Lino
Lino picca on colp
picca on colp se te ghe see, Lino
Lino, picca, picca Lino
….. nò inscì fòrt Lino:
chesta chì l’è ona saresada, l’è minga on colp…

oella, oella, òccio che ‘l va in trans
mòlla minga la cadèna, tegn saraa el didin
Lino, Lino, Lino indoe te l’hee miss el còrp?

A ghe n’hoo pù de còrp mì, ragazzi

Lino, Lino indoe te see, Lino, indoe te see andaa a finì?

El soo nò indoe son: soo domà che gh’hoo in man:
quattr ass, trii duu e quatter trii.

E l’è inscì ch’èmm capii
che el Lino l’era in paradis.