Stampa

di: Aurelio Barzaghi

 

 

 

E giri per Milan
in cerca d'ona strada che gh'è pù
d'ona finèstra con la tenda bloeu
e d'on cortil con tanti vos de fioeu.

E pensi al mè Milan
quand me svegliavi al son d'on orghenin
e a l'alber de Natal coi ciccolatt
e per regal on para de sciavatt.

E cont on did quanti facc
li pròppi sui veder impanaa
e sul coppin quanti s'giaff
che poeu se trasfomaven in carèzz.

E pensi al me Milan
a on lètt coi lenzoeu frègg scaldaa col fèrr
a on quader del Gesù taccaa sul mur
ch'el se pizzava quand faseva scur.

E quanti bèi stòri
in gir a on tòcch de lègn
cont i scintill che van, che van, che van per ari.

E adèss, adèss son chì
coi fioeu che se lamenten per nagòtt
sarà che i mè cavei diventen bianch
soo nò se l'è però me vegn de piang,
sarà che i mè cavei diventen bianch
soo nò se l'è però me vegn de piang.